Thellohet tragjedia në Poloni. Pas kontrolleve në shtëpinë e autorit të sulmit që la pas 6 viktima dhe të paktën 16 të plagosur, autoritetet kanë zbuluar tre persona të tjerë të pajetë, të cilët dyshohet se janë familjarë të tij.
Ngjarja e rëndë ndodhi këtë të shtunë në qytetin e Krakovit, ku një person i armatosur hapi zjarr ndaj qytetarëve, duke shkaktuar gjashtë viktima, katër gra dhe dy burra.
Sipas policisë polake, mes personave që humbën jetën është edhe një shtetas britanik. Të paktën 16 persona të tjerë kanë mbetur të plagosur, përfshirë dy efektivë policie që ndërhynë gjatë sulmit.
Kryeministri polak Donald Tusk, gjatë një deklarate për mediat, bëri të ditur se hetuesit kanë gjetur trupat e dy grave dhe një burri brenda banesës së autorit të dyshuar.
Sipas tij, viktimat dyshohet se janë pjesëtarë të familjes së sulmuesit, por autoritetet ende nuk kanë sqaruar rrethanat në të cilat kanë humbur jetën.
“Në shtëpinë e autorit të sulmit janë gjetur tre persona të pajetë, dy gra dhe një burrë. Ata me shumë gjasa janë anëtarë të familjes së sulmuesit”, deklaroi Tusk.
Mbetet gjithashtu e paqartë nëse tre personat e gjetur në banesë përfshihen në bilancin fillestar prej gjashtë viktimash apo nëse numri i përgjithshëm i të vdekurve mund të jetë më i lartë.
Si ndodhi sulmi në qendrën historike të Krakovit?
Sipas policisë polake, sulmi nisi rreth orës 15:00, kur një shtetas polak, rreth 25 vjeç, hyri me automjet në zonën e sheshit kryesor të Krakovit dhe qëlloi në mënyrë të përsëritur ndaj kalimtarëve.
I dyshuari mbante veshje të stilit ushtarak dhe përdori një armë të gjatë zjarri. Gjatë sulmit, të shtënat goditën edhe një tramvaj, duke thyer xhamin e kabinës së drejtuesit. Asnjë nga pasagjerët e tramvajit nuk pësoi lëndime.
Policia ndërhyri dhe arriti ta neutralizonte autorin pas një shkëmbimi zjarri. Efektivët e plagosën dhe e arrestuan, ndërsa më pas e transportuan në spital.
Njëri prej policëve të plagosur ka marrë tri plumba dhe ndodhet në gjendje të rëndë, sipas ministrit të Brendshëm polak, Marcin Kierwiński.
Gjatë kontrollit të automjetit të sulmuesit, hetuesit zbuluan armë të tjera zjarri dhe një sasi të konsiderueshme municionesh.
Ministri polak i Mbrojtjes e ka cilësuar sulmin një “akt terrorizmi”, ndërsa autoritetet po hetojnë motivin dhe të kaluarën e të dyshuarit.
Sipas raportimeve të mediave ndërkombëtare, hetuesit po shqyrtojnë informacione që e lidhin 25-vjeçarin me pikëpamje të ekstremit të djathtë. Megjithatë, policia nuk ka përcaktuar ende zyrtarisht motivin e sulmit.
Autoritetet kanë deklaruar se, bazuar në informacionet e deritanishme, i dyshuari ka vepruar i vetëm dhe se nuk ka të dhëna për një sulmues të dytë.
Pas sulmit, autoritetet vendore shpallën zi në Krakov deri më 11 nëntor, ndërsa policia dhe prokuroria vijojnë mbledhjen e provave dhe analizimin e pamjeve të kamerave të sigurisë.
Kryeministri Donald Tusk ka kërkuar hetim të plotë të ngjarjes, duke vlerësuar ndërhyrjen e efektivëve që ndaluan autorin dhe duke shprehur ngushëllime për familjet e viktimave.
Zbulimi i tre personave të pajetë në banesën e të dyshuarit ka hapur një tjetër drejtim hetimor. Autoritetet po përpiqen të përcaktojnë nëse vdekjet kanë lidhje me sulmin dhe nëse numri i përgjithshëm i viktimave do të ndryshojë.
