Një efektiv i FKS Shkodër, Nikoll Lekndreu, ka humbur jetën mbrëmjen e kaluar në fshatin Bardhaj. Pasi është takuar me disa miq të tij, ai ka qenë duke u kthyer në shtëpi me motor, po për shkak të stuhisë së madhe dhe erës e ka patur shumë të vështirë lëvizjen.
Policia e Shkodrës bëri me dije se efektivi, i cili ishte jashtë orarit të shërbimit, është aksidentuar me motomjetin e tij duke rënë në kanal ku ka humbur jetën. Policia e Shkodrës thotë se ngjarja është aksidentale.
“Ishte ora rreth 02:50, kur Nikoll Lekndreu, 51 vjeç, punonjës policie i Forcës Kombëtare të Sigurisë, Njësia Shkodër, dyshohet se ka humbur kontrollin mbi drejtimin e motomjetit, si pasojë e motit të keq, dhe për pasojë motomjeti i tij ka dalë nga rruga dhe ka rënë në një kanal me ujë. Shtetasin N. L. e ka marrë rrjedha e ujit dhe për pasojë ka humbur jetën.
Shërbimet e Policisë, përgjatë orëve të mëngjesit, gjatë kontrollit të kanalit që të çon në lumin Kir, kanë bërë të mundur gjetjen e trupit të pajetë të 51-vjeçarit.
Grupi hetimor vijon punën për sqarimin e rrethanave dhe dokumentimin ligjor të këtij rasti”, njoftoi policia vendore.
©️zërionline
