Në datat 28 dhe 29 shtator në Eko Parkun e Durrësit u zhvillua Kupa Kombëtare dhe Gara Ballkanike e ngjitjes sportive “Open Ballkan”, një aktivitet me rëndësi të veçantë për komunitetin sportiv dhe publikun.
Informacioni për Kupën Kombëtare dhe Garën Ballkanike të ngjitjes sportive “Open Ballkan”, e cila u zhvillua në Eko Parkun e Durrësit, u bë publik vetëm sot, pas përfundimit të eventit, përmes një postimi në Facebook nga kryetarja e Bashkisë. Ky aktivitet i rëndësishëm, që përfshinte rreth 100 sportistë nga Shqipëria, Mali i Zi, Maqedonia e Veriut dhe Kosova, kaloi pa njoftime të mëparshme për mediat dhe publikun, duke kufizuar mundësinë e përfshirjes nga ana e komunitetit.
Alpinistët, të ndarë në grupmosha të ndryshme, U14, U16 dhe të rritur, për femra dhe meshkuj, shfaqën talentin dhe përkushtimin e tyre në climbing wall-in e parkut. Por, për një aktivitet kaq të rëndësishëm dhe risi për zhvillimin e sportit dhe përfshirjen e të rinjve durrsakë në aktivitete të shëndetshme, mungesa e promovimit paraprak bëri që pjesëmarrja dhe ndjekja nga publiku të jenë shumë më të ulëta se sa mund të kishin qenë.
Eko Parku i Durrësit, një hapësirë moderne rekreative me fusha sportive dhe zona të gjelbëruara, e krijuar mbi ish-vendgrumbullimin e mbetjeve urbane, ofron një potencial të madh për organizimin e aktiviteteve sportive dhe sociale që do të tërhiqnin më shumë qytetarë, nëse do të kishte një strategji më të mirë informimi dhe promovimi.
©️zërionline
