Baleti klasik “Bukuroshja e Fjetur” i ktheu artdashësit të dielën në botën e përrallave, ku dashuria dhe e mira triumfojnë mbi të keqen. Me muzikën e pavdekshme të Tchaikovskit dhe një koreografi mahnitëse, kjo shfaqje solli në skenën e Teatrit “Aleksandër Moisiu” në Durrës magjinë e artit të baletit, duke i dhuruar publikut, vendas e të huaj, një përvojë unike.
Trupa e Baletit të Teatrit Shtetëror të Varnës përshkoi me elegancë skenën shqiptare, duke sjellë përpara artdashësve një performancë të rrallë, ku princat, princeshat dhe magjistarët ringjallen përmes lëvizjeve të balerinëve. Shfaqja u ofrua me hyrje të lirë, pa bileta, duke u ofruar jo vetëm si një dhuratë për qytetin, banorët dhe turistët e shumtë të huaj që e ndoqën shfaqjen, por edhe si një mënyrë për të promovuar bukurinë e baletit dhe muzikës klasike.
Veç interpretimit të përrallës së “Bukuroshes së Fjetur”, personazhe nga përralla të tjera të njohura u shfaqën në skenë, duke e bërë këtë event të veçantë dhe të pasur me elementë të ndryshëm artistikë.
Pauline Faget, një nga protagonistet e baletit, theksoi se përvoja në Durrës ishte magjike dhe një mundësi e shkëlqyer për të ndarë pasionin për baletin me publikun shqiptar.
Kjo shfaqje nuk ishte vetëm një interpretim artistik, por një rikthim në magjinë e fëmijërisë, ku të gjithë mund të besojnë në fuqinë e dashurisë dhe të ëndrrave të bukura. Pas Durrësit, në mbrëmje, trupa e teatrit të Varnës do të ngjitet në skenën e Teatrit Kombëtar të Operas dhe Baletit.
©️zërionline
