Më 13 tetor 2024, në Komisariatin e Policisë së Kavajës janë raportuar dy raste shqetësuese të zhdukjes së personave, ndërsa një incident tjetër ka ndodhur në Durrës gjatë orëve të para të mëngjesit.
Në Kavajë, shtetasi E.V., 38 vjeç, raportoi zhdukjen e vëllait të tij, L.V., 39 vjeç, i cili ishte larguar nga banesa në Golem rreth një muaj më parë dhe që nga ajo kohë nuk ka kontaktuar më. Policia po punon për të zbardhur vendndodhjen e 39-vjeçarit dhe për të kuptuar rrethanat e zhdukjes së tij. Nuk përjashtohet as pista e ndonjë krimi kundër personit.
Po atë ditë, një tjetër raportim për zhdukje u bë nga shtetasi H.M., 62 vjeç, i cili deklaroi se kishte humbur kontaktet me bashkëshorten e djalit të tij, S.P., 25 vjeçe. E reja kishte udhëtuar nga Italia, ku jetonte, drejt Aeroportit të Rinasit një ditë më parë, por që nga ajo kohë familjarët nuk kanë pasur asnjë lajm prej saj. Policia ka nisur kërkimet për të lokalizuar dhe siguruar të renë.
Ndërkohë, në orët e para të datës 14 tetor, një ngjarje alarmuese ndodhi në Durrës, ku shtetasi F.H., 21 vjeç, banues në fshatin Sallmone, u paraqit në spitalin rajonal për ndihmë mjekësore pasi dyshohet se kishte konsumuar një solucion pastrues në banesën e tij. 21-vjeçari është nën kujdesin e mjekëve dhe jashtë rrezikut për jetën, ndërsa hetimet janë në vazhdim për të zbardhur shkaqet dhe rrethanat që çuan në këtë incident.
Policia po vijon përpjekjet për të gjetur të zhdukurit dhe për të sqaruar tërësisht ngjarjet që kanë tronditur zonën.
©️zërionline
