Komisioni Qendror i Zgjedhjeve u mblodh sot për dhënien e mandatit të deputetit të Kuvendit të Republikës së Shqipërisë, kandidatit të listës shumemërore të Partisë Socialiste të Shqipërisë, Qarku Durrës, Erjon Meka.
Ky vendim vjen pasi Jurgis Cyrbja la mandatin pas thirrjes nga SPAK. Ai akuzohet se ka shpërdoruar detyrën me firmat që ka hedhur në 4 raste mbi pronësinë e gati 25 mijë metra katrorë tokë në zonën e Rrashbullit në Durrës duke favorizuar grupin e Shullazit. Hetimet ndaj tij lidhen me postin e drejtuesit të ZRRPP në Durrës, një detyrë që e mbajti deri në vitin 2017, kur edhe mori mandatin e parë në parlament.
I kallëzuar prej 2021 nga demokrati Edi Paloka, deputeti Cyrbja, i cili dorëzoi mandatin pak orë pasi u pyet në SPAK, ka këmbëngulur se nuk ka shpërdoruar detyrën dhe se nuk kishte kompetenca të kontrollonte praktikat që i delegoheshin nga vartësit e tij.Erjon Meka, 47 vjeç, ka përfunduar studimet në universitetin e Elbasanit për Financë-Kontabilitet dhe ka përvojë në administratën publike. Ai ka shërbyer si administrator i dy njësive administrative në Durrës. Pas njësisë nr. 3, Meka deri këtë tetor ishte administrator i njësisë nr.5 në bashkinë Durrës që përfshin lagje të mëdha në numër popullsie për qytetin, konkretisht lagjet 13, 14 dhe 17.
©️zërionline
