Në vijim të veprimeve hetimore dhe procedurale të kryera nga drejtoritë vendore të Policisë në Tiranë, Elbasan, Durrës, Fier dhe Lezhë, në bashkëpunim me prokuroritë përkatëse, për dokumentimin e paligjshmërive të ndodhura gjatë tubimeve të djeshme, Policia e Shtetit njoftoi se janë arrestuar 4 shtetas, përkatësisht 3 në Elbasan dhe 1 në Tiranë, për veprat penale “Organizimi dhe pjesëmarrja në grumbullime dhe manifestime të paligjshme”, “Mosbindja ndaj urdhrit të punonjësit të policisë së rendit publik”, si dhe/ose “Pengimi i qarkullimit të mjeteve të transportit”.
Ndërkohë u referuan në prokuroritë e Juridiksionit të Përgjithshëm 195 shtetas, ku procedimi ka nisur në gjendje të lirë për 92 në Durrës, 36 në Fier, 33 në Tiranë, 20 në Elbasan dhe 14 në Lezhë. Gjithashtu, janë shpallur në kërkim 5 shtetas, përkatësisht 3 në Elbasan dhe 2 në Tiranë.
Ndêrkaq janë referuar materiale në SPAK, ku ka nisur procedimi në gjendje të lirë për 16 deputetë në Kuvendin e Shqipërisë, 4 në Tiranë, 4 në Durrës, përfshirë Edi Palokën dhe deputetët pjesëmarrës në protestën e Rrogozhinës; 3 në Fier, 3 në Elbasan dhe 2 në Lezhë, si dhe për kryetarin e bashkisë Kavajë, për veprat penale “Pengimi i qarkullimit të mjeteve të transportit”, “Prishja e qetësisë publike” dhe “Kundërshtimi i punonjësit të policisë së rendit publik”.
Dita e djeshme ka shënuar grumbullime të këtyre shtetasve në pikat lidhëse të qyteteve Tiranë, Durrës, Elbasan, Fier dhe Lezhë, të cilët kanë penguar qarkullimin e mjeteve. Disa prej tyre kanë lënë automjetet e tyre në rrugë për të bllokuar qarkullimin.
Sipas Policisë, po vazhdon puna për kapjen e shtetasve të shpallur në kërkim, identifikimin e drejtuesve të automjeteve që bllokuan qarkullimin, dhe në drejtimin e prokurorive kompetente, po hetohet për të identifikuar shtetasit e tjerë të implikuar në paligjshmëri gjatë këtyre tubimeve.
©️zërionline
