Pas 11 ditësh qëndrimi në radën portuale të Durrësit, anija “Moliva” është ankoruar në terminalin e kontejnerëve. Nën asistencën dhe mbikëqyrjen e organeve ligjzbatuese dhe autoriteteve portuale, është realizuar procesi i shkarkimit të mbetjeve toksike të dyshuara.
Nga këtu, mbetjet do të transportohen me kamionë drejt Porto Romanos, pranë Eco Parkut, ku do të depozitohen përkohësisht dhe do të jenë nën survejim të rreptë të Policisë së Shtetit.
Sekuestrimi i ngarkesës u urdhërua nga Prokuroria e Durrësit, pasi dyshimet për përmbajtjen e saj të rrezikshme dhe të paligjshme u konfirmuan nga disa organizata ndërkombëtare, përfshirë Rrjetin e Aksionit të Bazelit, një organizatë mjedisore amerikane.
Kujtojmë që anija “Moliva” ishte nisur në prill dhe korrik drejt Azisë, por nuk u lejua të shkarkohet në destinacion, pas alarmit për mbetjet e rrezikshme. Për këtë ngarkesë, Prokuroria e Durrësit hapi hetime që prej muajit gusht, ndërkohë që një ditë para mbërritjes së saj, PD dhe qytetarë të Durrësit protestuan në hyrje të portit kundër kthimit të mbetjeve.
Pas shkarkimit të mbetjeve dhe zhvendosjes së tyre në Porto Romano, pritet të kryhen analiza për të vlerësuar shkallën e rrezikshmërisë së tyre dhe vijuar më tej hetimet mbi këtë çështje.
©️zërionline
