Gjatë protestës qytetare kundër krimit dhe dhunës mes të miturve në kryeqytet, këtë të enjte u lexua dhe një mesazh i nënës së Martin Canit, nxënësit të shkollës “Fan Noli” që u vra nga bashkëmoshatari i vet pas mësimit në fillim të kësaj jave.
Protesta e qytetarëve nisi nga shkolla “Fan Noli” dhe u zhvendos para Ministrisë së Arsimit.
Një protestuese ka lexuar mesazhin që i ka ardhur nga nëna e Martinit, drejtuar të gjithë atyre që u bënë bashkë kundër krimit që i mori të birin:
“Nuk mendoj se ka fjalë që e përshkruan këtë dhembje që na ka lënë pas një boshllëk që nuk do të mbushet kurrë. Falenderoj të gjithë popullin shqiptar për praninë dhe mbështetjen në këto çaste të vështira. S’di sa mirënjohëse mund të them që jam për ato që ju gjendën aty Martinit në momentet e tij të fundit. Ju falenderoj nga zemra. Martini ishte i mbushur me ëndrra dhe jetë. Ja morën të dyja. Si nënë, uroj që askush mos u sprovoftë me një dhembje të tillë. Respekte Florina dhe Angel Cani.” Ky ishte mesazhi i nënës së të miturit që dëshmon se dhe në momentet më të errëta të jetës së saj gjen fjalë mbështetëse dhe mirënjohjeje për të tjerët, pa akuzuar askënd pse heshtën, pse nuk e ndalën dot dorën e krimit. Në këtë mënyrë ajo i bën një apel të heshtur e therës drejtësisë dhe të gjithë shoqërisë për të reaguar dhe ndalur dhunën që merr jetë.
©️zërionline
