Prokuroria e Posaçme kundër Korrupsionit dhe Krimit të Organizuar (SPAK) ka ngritur një strukturë të veçantë hetimore për të parandaluar dhe ndjekur penalisht krimet zgjedhore gjatë zgjedhjeve parlamentare të majit 2025. Sipas njoftimit zyrtar, plani i masave është miratuar bazuar në një urdhër të firmosur më 24 janar nga drejtuesi i SPAK, Altin Dumani. Ky plan synon të garantojë integritetin e procesit zgjedhor dhe bazohet në “Strategjinë e Hetimit dhe Parandalimit të Krimit Zgjedhor gjatë Zgjedhjeve për Kuvendin 2025”, një dokument ende i papublikuar.
Strukturë qendrore dhe hetime në terren
Për zbatimin e këtij plani, SPAK ka ngritur një grup hetimor që përfshin një strukturë qendrore dhe ekipe hetimore në terren. Struktura qendrore do të drejtohet nga Altin Dumani dhe do të përfshijë prokurorë, hetues të Byrosë Kombëtare të Hetimit (BKH), ekspertë financiarë dhe staf mbështetës.
Ndërkohë, ekipet hetimore në terren do të veprojnë në të 61 bashkitë e 12 qarqeve të vendit. Ato do të monitorojnë dhe hetojnë raste të mundshme të përdorimit të administratës publike, infrastrukturës shtetërore dhe përfshirjes së grupeve kriminale në procesin zgjedhor.
Fokus në korrupsionin zgjedhor dhe monitorim të investimeve publike
SPAK do të hetojë veprat penale të lidhura me korrupsionin aktiv dhe pasiv në zgjedhje, si dhe ndërhyrjet e mundshme nga zyrtarë të lartë apo organizata kriminale. Një grup i posaçëm do të monitorojë gjithashtu përdorimin e buxhetit dhe investimet publike, duke ndaluar realizimin e projekteve gjatë fushatës zgjedhore për të shmangur keqpërdorimin e fondeve shtetërore për qëllime elektorale.
Platformë denoncimi dhe mbështetje qytetare
Për të forcuar transparencën, SPAK do të krijojë një platformë të posaçme për denoncime nga qytetarët dhe institucionet. Denoncimet do të mund të bëhen përmes një linje emergjence, raportimeve online dhe adresave elektronike të dedikuara. Megjithatë, kallëzimet penale do të pranohen vetëm në formë të rregullt procedurale pranë prokurorisë.
Një tjetër grup pune do të monitorojë informacionet e publikuara në media dhe rrjetet sociale, duke identifikuar raste të dyshimta që do t’i referohen grupeve hetimore për verifikim.
SPAK u bën thirrje institucioneve, shoqërisë civile, mediave dhe qytetarëve që të kontribuojnë në mbrojtjen e procesit zgjedhor dhe respektimin e ligjit.
©️zërionline
