Policia ka goditur një rast të transportimit të paligjshëm të emigrantëve, duke shpallur në kërkim një 22-vjeçar dhe duke vijuar punën për identifikimin e bashkëpunëtorit të tij.
Në kuadër të operacionit policor të koduar “The Night Agents”, specialistët për Hetimin e Trafiqeve të Paligjshme në DVP Durrës, në bashkëpunim me shërbimet e Komisariatit të Policisë Kavajë, ndërhynë në fshatin Ballaj, Kavajë, pas informacioneve operative se dy persona po transportonin emigrantë të paligjshëm drejt Kakavijës, me destinacion Greqinë.
Gjatë operacionit, u konstatuan dy automjete të dyshuara që transportonin emigrantë nga Nepali dhe India. Në momentin e ndërhyrjes së Policisë, drejtuesit e automjeteve nuk iu bindën urdhrit për të ndaluar, por shtuan shpejtësinë dhe, duke përfituar nga errësira, braktisën automjetet dhe u larguan me shpejtësi.
Si rezultat i hetimeve, u identifikua dhe u shpall në kërkim shtetasi E. M., 22 vjeç, banues në Fier, si drejtuesi i njërit prej automjeteve Opel, për veprën penale “Dhënie ndihmë për kalim të paligjshëm të kufirit”. Ndërkohë, vijon puna për identifikimin e drejtuesit të automjetit tjetër (tip Audi).
Ndaj emigrantëve nga Nepali dhe India u iniciua procedim penal për veprën penale “Kalim i paligjshëm i kufirit”, pasi kishin hyrë ilegalisht nga kufiri jeshil me Malin e Zi, me qëllim kalimin drejt Greqisë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.
©️zërionline
