Trupi i 12-vjeçarit Leo Sadiku, i cili humbi jetën në Spitalin e Tiranës më 8 janar të këtij viti, është zhvarrosur sot në Maliq për t’iu nënshtruar autopsisë. Procesi është kryer nga ekspertët e Institutit të Mjekësisë Ligjore, të shoqëruar nga prokurorë të Prokurorisë së Tiranës, e cila po heton rastin, si dhe në prani të familjarëve të të miturit.
Ekspertët pritet të marrin mostra nga trupi i 12-vjeçarit, të cilat do të dërgohen për analiza në Institutin e Mjekësisë Ligjore, me qëllim përcaktimin e shkakut të vdekjes. Sipas mjekëve të QSUT-së, Leo Sadiku ndërroi jetë si pasojë e miokarditit akut. Megjithatë, familjarët kanë ngritur dyshime dhe akuzojnë stafin mjekësor për neglizhencë në trajtimin e tij.
Fillimisht, pas vdekjes së 12-vjeçarit, familjarët refuzuan kryerjen e autopsisë, por me nisjen e hetimeve nga Prokuroria e Tiranës, e cila është kompetente për rastin, autoritetet vendosën të kryejnë ekzaminimin mjeko-ligjor.
Familjarët kanë reaguar vazhdimisht për këtë rast, duke protestuar dhe kërkuar që hetimi të jetë i plotë dhe të përcaktohet me saktësi shkaku i vdekjes së djalit nga fshati Poçestë i Maliqit.
©️zërionline
