Hetimet për “Ikonat”, a ishin autentike? 

Përveç prokurorisë së Durrësit, mësohet se është ngritur dhe një grup pune me ekspertë të trashëgimisë kulturore për të vlerësuar autenticitetin dhe vjetërsinë e objekteve të sekuestruara gjatë operacionit të koduar “Ikonat” dhe përcaktuar dëmin e shkaktuar nga kjo veprimtari e paligjshme në rast se objektet do të jenë origjinale dhe jo kopje, imitime të tyre. Ndërkohë Gjykata e Durrësit ka lënë në qeli të arrestuarit në kuadër të këtij operacioni, mes tyre dhe ish-punonjësi i një parku arkeologjik. Gjyqtarja e seancës Entela Shedula pasi dëgjoi palët vleftësoi të ligjshëm arrestimin e shtetasve Pëllumb Leka dhe Emanuel Çaço dhe pranoi kërkesën e prokurorisë për caktimin e masës së sigurisë “arrest në burg” për të dy të dyshuarit e veprës penale të trafikimit të veprave të artit dhe kulturës. Të arrestuarit kanë deklaruar se objektet e sekuestruara janë kopje dhe jo origjinale, por do të jenë ekspertët që do t’i vlerësojnë ato. Leka 53 vjeç, banues në Fier, dhe E. Çaço, 56 vjeç, banues në Lushnjë, sipas policisë, u kapën në flagrancë gjatë operacionit në vendin e quajtur “Bishti i Zhurit”, Rrogozhinë, në fund të marsit duke lëvizur me një automjet në të cilin gjatë kontrollit u gjetën dhe sekuestruan 13 statuja dhe ikona të madhësive dhe formave të ndryshme. Nga veprimet hetimore dyshohet se këta shtetas, në bashkëpunim me njëri-tjetrin, merreshin me trafikimin e veprave të artit dhe kulturës. Duke përfituar nga fakti se ishtë i punësuar pranë parqeve arkeologjike, herë si rojë dhe herë si ndihmës, P. Leka siguronte statuja dhe ikona të madhësive të ndryshme në qytetet Fier, Berat, Gjirokastër, dhe më pas në bashkëpunim me shtetasin tjetër, i trafikonin me qëllim përfitimin. Sipas hetimeve paraprake, një pjesë të statujave dhe ikonave ua shisnin shtetasve të huaj nga Italia, Greqia dhe Mali i Zi, kundrejt vlerave që varionin nga 10 000 deri në 20 000 euro. @zërionline *Ripublikimi i materialeve tona lejohet vetëm nëse bëhet citimi i autorit, burimit origjinal.