Një operacion i koduar “Double”, i zhvilluar nga Policia e Shijakut me mbështetjen e inteligjencës policore, është finalizuar me arrestimin e një 30-vjeçari dhe shpalljen në kërkim të babait të tij, pasi në banesën e tyre në Maminas u gjetën armë zjarri dhe municion luftarak.
Operacioni u zhvillua në kuadër të masave për ndalimin e poseduesve të armëve pa leje, që përbëjnë rrezik për rendin dhe sigurinë publike. Gjatë kontrolleve të kryera në banesën familjare në Maminas, policia gjeti dhe sekuestroi një armë automatike kallashnikov, një pistoletë, katër karikatorë dhe 157 fishekë luftarak.
Si rezultat, u arrestua në flagrancë shtetasi Saimir Sefaj, 30 vjeç, ndërsa babai i tij, 54-vjeçari Shefqet Sefaj, është shpallur në kërkim dhe po vijojnë veprimet për kapjen e tij.
Materialet procedurale janë referuar pranë Prokurorisë së Durrësit për vijimin e hetimeve dhe veprimeve të mëtejshme ligjore.
©️zërionline
