Një ngjarje e rëndë rrugore ka ndodhur në bulevardin “Dëshmorët e Kombit”, ku tre të mitur që udhëtonin me dy skuterë janë përplasur nga një automjet në levizje. Si pasojë e përplasjes, dy prej tyre kanë mbetur rëndë të plagosur dhe janë dërguar me urgjencë drejt spitalit për ndihmë të specializuar mjekësore.
Policia bëri të ditur se drejtuesi i mjetit është ndaluar menjëherë në vendngjarje dhe është shoqëruar në komisariat, ndërsa pritet një hetim i plotë për zbardhjen e rrethanave të aksidentit.
Burime zyrtare bëjnë me dije se grupi hetimor po punon për të përcaktuar shkakun e aksidentit, përfshirë verifikimin e shpejtësisë së automjetit, respektimin e rregullave të qarkullimit nga të miturit dhe elementët teknikë të rrugës. Ndërkohë, sipas burimeve spitalore, dy prej fëmijëve ndodhen në gjendje me të rëndë, por nën kujdes të vazhdueshëm, ndërsa i treti ka marrë dëmtime më të lehta.
Ky aksident ngre edhe njëherë alarmin për sigurinë rrugore të fëmijëve dhe përdorimin e skuterëve elektrikë në rrugët urbane pa masa mbrojtëse dhe pa kontroll të rregulluar ligjor.
©️zërionline
