Një krim i rëndë mjedisor në zemër të lumit Vjosa. Një përrua me naftë bruto edhe një herë tjetër është derdhur në lumin e shpallur Park Kombëtar nga qeveria shqiptare si lumi i fundit i egër i Evropës. Organizatat ndërkombëtare të mjedisit kanë evidentuar situatën alarmante, ndërsa reagimi i autoriteteve mungon.
Parku Kombëtar i Vjosës është përballë një krimi të rëndë mjedisor. Një nga lumenjtë e fundit të egër në Evropë, ku jetojnë më shumë se 1000 lloje kafshësh dhe bimësh, kërcënohet seriozisht nga nafta që buron nga stacioni i Gorishtës në Selenicë, e cila ka vërshuar në formën e një përroi drejt lumit Vjosa.
Park Kombëtar i Vjosës ende kërcënohet nga mbetjet e përpunimit të naftës. I pari që dokumentoi ndotjen në lumin e Vjosës ishte fotografi dhe aktivisti i RiverWatch Joshua David Lim, përmes një video të ndarë në rrjetet e tij sociale, i cili e përshkruan zonën e Vjosës si një “një lumë të vdekur, ku asgjë nuk mbijeton”.
Reagimi i autoriteteve mungon, ndërsa një muaj më parë u aplikua për ta përfshirë Vjosën në UNESCO, si pjesë e Rrjetit të Rezervave të Biosferës. Organizata “EcoAlbania” ka ndarë këto pamje të ndotjes skandaloze në të cilat dallohet se nafta derdhet në lumin e Vjosës, aq sa ka shkaktuar edhe ngordhjen e gjallesave. Siç shihet edhe në pamje, një gjarpër ka ngordhur për shkak të ndotjes nga nafta.
Pamjet janë kapur në afërsi të Poçemit në Mallakastër, i cili shtrihet në këmbë të krahinës së Vllahinës, aty ku ndodhet fusha burimore naftëmbajtëse Gorisht-Kocul, që administrohet nga kompania Albpetrol. Nafta e Gorishtit vërshon nga stacioni në Vjosë pasi i bashkohet Përroit të Madh të Mërtirajt.
