Një 38-vjeçar goditi me thikë një efektiv policie në Durrës, i cili, së bashku me kolegë të tjerë, ndërhyri për ta vënë atë nën kontroll pasi lëvizte me thikë në dorë në rrugët e qytetit. Ngjarja ndodhi, pak para mesditës, në një nga rrugët kryesore të qytetit bregdetar, në lagjen nr. 1, apo siç njihet ndryshe tek “Vollga”. Policia u njoftua nga qytetarë të alarmuar nga prania e rrezikshme e një personi agresiv që bënte veprime të pakontrolluara dhe kishte thikë në dorë, në rrugën që të çon drejt Currilave. Menjëherë, shërbimet e policisë kanë shkuar për të verifikuar rastin dhe shmangur rrezikun që mund t’u kanosej qytetarëve. Kur e kanë konstatuar 38-vjeçarin me thikë në dorë kanë ndërhyrë për largimin e tij nga rruga, por ai u është kundërpërgjigjur duke e goditur në dorë njërin prej punonjësve të policisë, i cili është dërguar në spital për mjekim. Nga spitali raportohet për dëmtim të lehtë të efektivit, ndërsa policia sekuestroi thikën dhe shoqëroi në komisariatin e Durrësit autorin e dyshuar. Nga veprimet paraprake dhe deklarimet e të shoqëruarit në polici rezulton se 38-vjeçari vuan nga probleme të shëndetit mendor.
Me rritjen e temperaturave, problemet e shëndetit mendor rëndohen duke u kthyer në faktor rreziku dhe për qytetarët në rrugë.
©️zërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
