Një grabitje me armë zjarri ka ndodhur në lagjen nr. 13 të qytetit bregdetar, ku një shtetas është kanosur dhe i është marrë një shumë parash. Policia ka arrestuar njërin prej autorëve të dyshuar dhe po vijon kërkimet për tre të tjerë.
Ngjarja është denoncuar nga shtetasi A. I., i cili ka deklaruar se mëngjesin e djeshëm, tre persona e kanë ndaluar dhe e kanë kërcënuar me armë zjarri, duke i marrë 150.000 lekë. Pas kallëzimit, specialistët për Hetimin e Krimeve në Komisariatin e Policisë Durrës, në bashkëpunim me Seksionin për Hetimin e Krimeve ndaj Personit në DVP Durrës, kanë nisur menjëherë hetimet.
Si rezultat i veprimeve të shpejta, është arrestuar shtetasi A. L., 40 vjeç, banues në Durrës, i dyshuar si një nga autorët e përfshirë në këtë grabitje. Ndërkohë, janë shpallur në kërkim edhe tre shtetas të tjerë: R. I., 40 vjeç, L. I., 20 vjeç dhe E. M., 34 vjeç, të gjithë banues në Durrës.
Policia po vijon punën për kapjen e personave të shpallur në kërkim dhe për dokumentimin e plotë të rrethanave të ngjarjes.
Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme ligjore.
©️zërionline
