Veliera shkollë “Mircea”, krenaria e marinës ushtarake rumune, ka mbërritur në portin e Durrësit, duke sjellë me vete një histori mbi 85-vjeçare të traditës detare dhe formimit të brezave të rinj të kadetëve rumunë.
E ndërtuar në vitin 1938 në kantierin prestigjioz gjerman Blohm & Voss, “Mircea” është një velierë elegante me tre direkë, që prej vitit 1939 ka shërbyer si anije shkollë për Akademinë Detare Rumune. Emrin e mban nga princi i njohur i Vllahisë, Mircea cel Bătrân, duke trashëguar misionin e anijes së parë stërvitore të vendit.
Gjatë dekadave, veliera ka përshkuar shumë dete e oqeane, duke përfaqësuar Rumaninë në misione stërvitore dhe festivale prestigjioze ndërkombëtare. Ndër pjesëmarrjet më të rëndësishme renditet festivali “OPSAIL 1976” në Shtetet e Bashkuara, i zhvilluar me rastin e 200-vjetorit të Pavarësisë Amerikane.
E veçantë për elegancën dhe simbolikën që mbart, “Mircea” ka “motra binjake” në SHBA, Gjermani, Ukrainë dhe Portugali, të gjitha të ndërtuara sipas të njëjtit projekt. Por “Mircea” mbetet një ndër më të dashurat për brezat e marinarëve rumunë, që kanë mësuar zanatin detar mbi kuvertën e saj.
Me një gjatësi prej mbi 82 metrash dhe direkë që arrijnë deri në 44 metra lartësi, ajo ofron kapacitete për të trajnuar 135 kadetë njëherësh, të shoqëruar nga një ekuipazh prej 89 profesionistësh.
Pas rikonstruksionit të plotë në vitin 2002, “Mircea” ka ruajtur linjat klasike të një velierë tradicionale, ndërsa është pajisur me teknologji të avancuar për të përmbushur sfidat bashkëkohore të navigimit. Sot, ajo cilësohet si një nga anijet më të mira të klasit të saj në botë.
Ankorimi i “Mircea”-s në portin e Durrësit është një moment i veçantë për qytetin bregdetar shqiptar dhe një mundësi për qytetarët që të njihen nga afër me një pjesë të historisë detare europiane.
©️zërionline
