Një aksident tragjik ku mbetën të vdekur 8 persona ndodhi mëngjesin e 2 prillit në rrugën Përmet-Këlcyrë. 7 pasagjerët dyshohet se ishin emigrantë të paligjshëm nga vendet e treta, ndërsa shoferi nga Shkodra. Asnjë prej tyre nuk është identifikuar deri më tani. Makina ku udhëtonin, ishte marrë me qira dhe nuk ishte në pronësi të shoferit që humbi jetën.
Dyshohet se shoferi nga Shkodra ende i paidentifikuar ishte pikasur nga policia në afërsi të Këlcyrës dhe është kthyer pas, duke i dhënë gaz mjetit për të rritur shpejtësinë e largimit për të mos u kapur në flagrancë nga policia me emigrantët e paligjshëm në mjet, por ka dalë nga rruga, pranë kthesës së Kuqarit. Në momentin e daljes nga rruga dyshohet se mjeti ka qenë qenë me shpejtësi rreth 200 km në orë. Ai ka lëvizur në linjë ajrore disa metra dhe më pas është përmbysur në një shpat të pjerrët buzë lumit Vjosa.
