Një shqiptar i Kosovës humbi jetën tragjikisht në një aksident të rëndë, teksa udhëtonte me një “Ferrari”. Ngjarja ndodhi të dielën në Italinë veriore.
40-vjeçari Isa Q., i cili banonte në Zvicër, ishte DJ me profesion. Nga pamjet e ndara nga gazeta zviceriane Blick, Ferrari GT C4 i bardhë me të cilin ai lëvizte është copëtuar dhe ndarë në dy pjesë. Viktima ishte duke lëvizur me mbi 200 km/h kur ka rrëshqitur në rrugën e lagësht dhe është përplasur me ndarëset anësore.
40-vjeçari, vetëm disa orë para vdekjes ishte në një klub nate në kantonin e Valais dhe pas performancës ishte nisur me Ferrari për në Itali. Vëllai i tij 41-vjeçar ka konfirmuar se automjeti i përkiste atij.
“Është e vështirë ta përshkruash me fjalë këtë person të madh dhe pozitiv. Por nëse do të më duhej ta përshkruaja me një fjalë, do të thosha se ai ishte personi më i dashur që e kam njohur”, tha i vëllai. Dyshohet se bashkë me të ka humbur jetën edhe një grua. Sipas raportimeve të mediave italiane, identifikimi është i vështirë pasi ata u dogjën në veturën që mori flakë. Ndërkohë, policia italiane e zonës ku ndodhi aksidenti ka kontaktuar disa të afërm dhe u ka kërkuar atyre që të ndihmojnë në identifikimin e të vdekurve përmes analizës së ADN-së.
