“Pengmarrja e fëmijëve”, Ngjarja që nxorri në pah pasojat fatale të përdorimit të narkotikëve tek e gjithë shoqëria.
Fëmijët vunë në lojë babain nën efektin e narkotikëve, por dhe policinë e të gjithë opinionistët. Prokuroria heq akuzën e pengmarrjes dhe kundërshtimit të policisë ndaj Aleks Markut.
“Djali më tha se po i sulmonin. Nuk i pashë, po qëllova.”Këtë ka deklaruar në sallën e gjyqit Aleks Marku për të cilin Gjykata e Durrësit caktoi “arrest në burg”. 40-vjeçari u arrestua nga forcat RENEA të mërkurën, pasi qëlloi me automatik dhe mbajti peng dy fëmijët e mitur.
Në gjykatën e Durrësit u zhvillua me dyer të mbyllura seanca për vleftësimin dhe caktimin e masës së sigurisë ndaj Markut. Gjyqtari Shkëlzen Liçaj e vleftësoi të ligjshëm arrestimin dhe pasi dëgjoi palët caktoi masën shtrënguese “arrest në burg” pa afat për të.
40-vjeçari në dëshminë e tij pas arrestimit deklaroi se ka qëlluar me armë pasi dyshonte se po e sulmonin brenda banesës që kishte marrë me qira buzë detit në zonën e Shkëmbit të Kavajës. Edhe nga deklarimet në sallën e gjyqit ku deklaroi se qëlloi për të mbrojtur fëmijët dhe pse nuk shihte njeri krijohet përshtypja se duke parë gjendjen e babait, që dyshohet se ishte nën efektin e narkotikëve, fëmijët e kanë vënë në lojë gjë që ka rezultuar fatale pas reagimit me armë të tij.
Prej pak javësh, ai ishte vendosur me familjen në Durrës për t’i shpëtuar kërkimit të mundshëm policor pas thyerjes së masës së sigurisë “arrest në shtëpi” në shtetin fqinj Itali, ku është nën hetim për vjedhje.
Marku u paraqit pa avokat mbrojtës, ndaj iu caktua kryesisht nga gjykata, ndërsa në sallë nuk ka pasur as familjarë të tij. Ndaj Markut rëndojnë akuzat e armëmbajtjes pa leje, shkatërrimit të pronës dhe prishjes së rendit e qetësisë publike, ndërsa kanë rënë akuzat për heqje të paligjshme të lirisë dhe kundërshtim i forcave të policisë.
@zërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
