Rreth 250 avokatët aktivë të Dhomës Vendore të Durrësit nuk kanë mundur t’i rikthehen këtë të mërkurë gjyqeve të tyre. Pas bojkotit dyditor dhe arritjes së marrëveshjes mes Dhomës së Avokatisë dhe Gjykatës Durrës u vendos që më 5 qershor avokatët të vijonin aktivitetin e tyre, duke kthyer normalitetin edhe në veprimtarinë e gjykatës, por vendimi i Këshillit të Përgjithshëm të Dhomës Kombëtare të Avokatisë ka bërë që bojkoti të vijojë dhe për tri ditët në vazhdim. Këtë herë në shenjë proteste për dhunën e ushtruar ndaj avokatit Sokol Mëngjesi që u dhunua barbarisht për shkak të detyrës disa ditë më parë.
Ata do të vijojnë të mos paraqiten në seancat gjyqësore, ndërsa janë të paktën 500 seanca gjyqësore që nuk do të zhvillohen në mungesë të tyre përgjatë kësaj jave në gjykatën e Durrësit.
Avokatët e të gjitha gjykatave në vend kanë vendosur të përfshihen në një bojkot tre-ditor, pas vendimit të Këshillit të Përgjithshëm të Dhomës Kombëtare të Avokatisë.
Një ditë më parë, Këshilli i Përgjithshëm i Avokatëve vendosi që për tri ditë, avokatët në të gjithë vendin do të braktisin çdo proces civil, penal dhe administrativ. Madje dhe kushtetues. Përjashtim bëjnë vetëm seancat e masave të sigurisë.
Mbledhja u thirr një ditë pasi avokati Sokol Mëngjesi, i cili vazhdon të jetë i intubuar prej një jave, u transportua për kurim më të specializuar në Greqi. Sokol Mëngjesi u sulmua nga persona të afërt dhe dhëndri i klientit të tij Dritan Nano. Konflikti me avokatin kishte nisur pasi i dyshuari nuk po respektonte kontratën e pagesës mbi një proces pronësie, për të cilën familjarët e Nanos kanë denoncuar në polici se është falsifikuar nga një tjetër i afërm i tyre.
©️zërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
