Dy vëllezër, përkatësisht 55 dhe 62 vjeç, që e përdornin hotelin e tyre në Rrogozhinë edhe për prostitucion janë arrestuar nga policia, së bashku me dy gra të reja, përkatësisht 30 dhe 39 vjeçe nga Durrësi. Arrestimi i tyre erdhi pas një hetimi disa javor që çoi në organizimin e operacionit të koduar “Perëndimi i diellit” (Sunset). Gjatë operacionit u sekuestrua dhe hoteli në pronësi të dy vëllezërve dhe një shumë parash që dyshohet se është fituar nga kjo veprimtari.
Ndaj vëllezërve Hoxha janë ngritur paraprakisht akuzat për veprat penale “Shfrytëzim i prostitucionit” dhe “Mbajtja e lokaleve për prostitucion”, të kryera në bashkëpunim; ndërsa ndaj dy grave nga Durrësi rëndon akuza e ushtrimit të prostitucionit në ambjentet e hotelit që u vendos nën sekuestër.
Me shtimin e numrit të turistëve në vend po shtohet ndjeshëm edhe veprimtaria e paligjshme e prostitucionit, në të cilën janë përfshirë dhe shtetasit e huaj. Ndaj policia e ka vënë në fokus. Gjatë 4 muajve të fundit policia e Durrësit ka goditur disa raste, gjatë të cilave janë arrestuar 6 persona, ndërsa janë nën hetim në gjendje të lirë dhe 9 të tjerë. Shumica e të proceduarve për ushtrim a shfrytëzim prostitucioni, 8 prej tyre, janë shtetas të huaj, kryesisht nga vendet e Amerikës Latine, Spanja, SHBA dhe Bjellorusia.
©️zërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
