Një aksident i rëndë automobilistik ka ndodhur sot pasdite në aksin rrugor Gjiri i Lalëzit-Maminas, në Hamallaj të Durrësit.
Sipas burimeve zyrtare, rreth orës 15:40, automjeti i drejtuar nga 25-vjeçari O. M. u përplas me një automjet tjetër, të drejtuar nga 20-vjeçari Eriseld Kamberi, ku ndodhej edhe pasagjeri 16-vjeçar Alban Hasrama. Hetimet paraprake tregojnë se automjeti ku ndodheshin dy të rinjtë i ndërpreu rrugën mjetit tjetër për të kaluar nga rruga kryesore për të hyrë në Hamallaj.
Fatkeqësisht, Hasrama humbi jetën nga plagët e marra, ndërsa Kamberi mbeti i plagosur dhe u transportua menjëherë në spitalin e traumës në Tiranë. Grupi hetimor ndodhet në vendngjarje dhe po punon për të zbardhur rrethanat dhe shkaqet e aksidentit.
@zërionline
