Këtë fundjavë, dy ngjarje të rënda rrugore shkaktuan humbjen e jetës së dy të rinjve, përkatësisht 16 dhe 22 vjeç, si dhe plagosjen e një 20-vjeçari.
Aksidenti i parë ndodhi në orët e pasdites në aksin rrugor Gjiri i Lalëzit-Maminas, në Hamallaj. Sipas burimeve policore, një automjet i drejtuar nga një 25-vjeçar u përplas me një tjetër automjet, ku ndodheshin drejtuesi 20-vjeçar, Eriseld Kamberi, dhe pasagjeri 16-vjeçar, Alban Hasrama. Për fat të keq, 16-vjeçari Hasrama humbi jetën nga plagët e marra, ndërsa Kamberi u plagos dhe u transportua menjëherë në spitalin e traumës në Tiranë. Nga hetimet e para rezulton se automjeti i 20-vjeçarit ka ndërprerë rrugën kryesore për të kaluar në atë dytësore, duke u përplasur me automjetin që vinte nga Gjiri i Lalëzit.
Disa orë më vonë, një tjetër ngjarje e rëndë u regjistrua në hyrje të Durrësit, tek Ura e Dajlanit. Automjeti me drejtues shtetasin Albi Hoxha, 22 vjeç, humbi kontrollin mbi mjetin dhe u përplas lehtë me trafikndarësen. Nga veprimet e para hetimore, policia bëri me dije se i riu dyshohet të ketë pësuar një arrest kardiak gjatë drejtimit të automjetit dhe për pasojë ka humbur jetën.
Dy aksidentet tragjike kanë tronditur opinionin publik, duke ngritur edhe një herë shqetësimet për sigurinë rrugore dhe nevojën për kujdes të shtuar nga të gjithë përdoruesit e rrugës, veçanërisht në këtë stinë të nxehtë. Hetimet e mëtejshme pritet të zbardhin plotësisht rrethanat e këtyre ngjarjeve.
@zërionline
