Nuk ndodhi siç pritej, varkat me vela nuk mbërrijnë këtë të shtunë, më 6 korrik, siç ishte parashikuar në Durrës. Edhe fshati turistik që do të hapej mesditën e së shtunës në shëtitoren “Taulantia” në kuadër të kësaj ngjarjeje të bukur sportive ujore nuk është ngritur në kohë. Ky fshat buzë detit do të shërbente si atraksion i veçantë, pasi të gjithë të apasionuarit pas varkave me vela do të mund të merrnin të gjithë informacionin e nevojshëm për këtë tur, varkat pjesëmarrëse, sportistët e përfshirë në këtë tur etj.
Gjithsesi, e diela premtohet të jetë dita e varkave me vela, që e përfshin për herë të parë Durrësin në xhiron e velave të Italisë, event ky i Marinës Ushtarake Italiane.
Gara ka nisur nga Xhenova. Varkat me vela do të ndalojnë në 10 qytete turistike, 9 prej tyre në Itali dhe për herë të parë, një ndalesë e këtij turi do të jetë në Durrës.
Mëngjesin e së dielës pritet mbërritja e afro 30 varkave me vela pjesëmarrëse në këtë tur, të cilat do të mund të admirohen nga shëtitorja “Taulantia”.
Ceremonia e mikpritjes është parashikuar të zhvillohet mbrëmjen e së dielës në shëtitore, ndërsa mëngjesin e së hënës, 9 korrik, varkat me vela do të largohen nga Durrësi për të vijuar xhiron e tyre, drejt ndalesës së radhës në Itali.
Janë 10 etapa për ekipet që garojnë në kategoritë Offshore, Inshore dhe Boards. Ky event sportiv i shërben edhe promovimit të turizmit dhe bukurive të qytetit dhe vendit tonë.
@zërionline
Na mbetet vetëm të presim 7 korrikun kur varkat me vela të mbërrijnë në Durrës.
