Në 42-vjetorin e lindjes, baritoni me famë ndërkombëtare Gëzim Myshketa kthehet në vendlindje me një koncert në Amfiteatrin Antik të Durrësit. Ai u kthye me këtë koncert të hapur për publikun në qytetin e lindjes, ndërsa i parapriu dhe një koncert në hotelin ikonik të bregdetit shqiptar, në hotel “Adriatik”.
I shoqëruar nga kori, solistët dhe Orkestra Simfonike e TKOB-së, Myshketa interpretoi një repertor të përzgjedhur këngësh shqiptare dhe ariesh të njohura nga kryeveprat operistike.
Ndonëse është ngjitur në skenat më prestigjioze botërore, koncertet në vendlindje sjellin një emocion të veçantë për Myshketën. Mes atyre që ndoqën koncertin në Amfiteatër ishte dhe presidenti i Republikës Bajram Begaj.
Koncerteve u parapriu dhe masterclass-i “Durrës opera art of singing” që është një nisëm që po merr jetë si realizim i një ëndrre që këngëtari lirik ka për t’i dhënë një mundësi qytetit të tij të lindjes në fushën operistike. Ai mblodhi talente nga vendi, Kosova dhe bota, duke ofruar ekspertizën për këta studentë që nesër pritet të pushtojnë skenat botërore.
@zërionline
