Ndryshe nga sa ishte premtuar më 6 korrik, pasditja e së dielës solli varkat me vela në Durrës. Sipas bashkisë Durrës, mungesa e erës e vështirësoi mbërritjen e tyre në kohë. Për herë të parë, Durrësi përfshihet në xhiron e velave të Italisë, një event i njohur i Marinës Ushtarake Italiane.
Gara ka nisur nga Xhenova dhe varkat me vela do të ndalojnë në 10 qytete turistike, 9 prej tyre në Itali, dhe për herë të parë, një ndalesë e këtij turi bëhet edhe në një qytet shqiptar, Durrësi. Afro 30 varka me vela, pjesëmarrëse në këtë tur, do të mund të admirohen nga shëtitorja bregdetare “Taulantia”, ndërsa ceremonia e mikpritjes është parashikuar të zhvillohet mbrëmjen e së dielës në shëtitoren bregdetare.
Janë 10 etapa për ekipet që garojnë në kategoritë Offshore, Inshore dhe Boards. Ky event sportiv i shërben edhe promovimit të turizmit dhe bukurive të Durrësit dhe Shqipërisë.
Në fillimjavë, varkat me vela do të largohen nga Durrësi për të vijuar xhiron e tyre drejt ndalesës së radhës në Itali.
@zërionline
