Gjykata e Lartë rrëzoi kërkesën e dy grave, Edlira Mara dhe Alba Ahmetaj, për regjistrimin nga ana e gjendjes civile të dy fëmijëve me të drejta mëmësie të barabarta. Gjykata e Lartë la të mërkurën në fuqi vendimin e Gjykatës së Apelit, që i dha të drejtë Zyrës së Gjendjes Civile për të mos i regjistruar fëmijët “me të drejta të barabarta amësie”. Dy vajzat që rriten nga çifti janë të regjistruar me amësi të Edlirës, ndaj prej disa vitesh dy gratë u përfshinë në një betejë ligjore.
Pak kohë më pare, në maj të këtij viti, ato e kurorëzuan lidhjen e tyre me një ceremoni martesore të zhvilluar në taracën e bashkisë Tiranë, duke rindezur debatin për martesat brenda gjinisë në vend.
Prej disa vitesh, Edlira dhe Mara kishin ngritur padi në Gjykatën Administrative kundër Zyrës së Gjendjes Civile pasi nuk i regjistronte fëmijët me mëmësi të dy nënave paditëse. Pasi padia nuk u pranua nga gjykata e shkallës së parë dhe as ajo e Apelit administrativ, çështja mbërriti në Gjykatën e lartë e cila duke interpretuar Kodin e Familjes që është shterues në këtë drejtim u shpreh se institucioni përkatës nuk mund ta bëjë regjistrimin e kërkuar pasi është antiligjor.
Regjistrimi me dy mëmësi, apo atësi nuk njihet nga legjislacioni shqiptar, ashtu si dhe martesat homoseksuale, ndaj kjo padi është rrëzuar, por dy paditëset të cilat ishin të pranishme në gjykatë, përmes avokates së tyre, deklaruan se nuk do të dorëzohen dhe do ta dërgojnë çështjen e tyre për interpretim procedurial në Gjykatën Kushtetuese.
Ky veprim pritet vetëm pasi Gjykata e Lartë të zbardhë vendimin e kësaj të mërkure që fashit të gjitha përpjekjet dhe zërat për tolerancë të ligjit ndaj çifteve LGBTQI+.
@zërionline
