Mospagimi i borxhit çon në vetëgjyqësi dhe krim. Një plagosje me armë zjarri tronditi qytetin bregdetar të Durrësit mbrëmjen e së enjtes kur një 31-vjeçar i identifikuar si Adil Hizdri nga Shijaku qëlloi me pistoletë ndaj 70-vjeçarit Fadil Hunda. Motiv i ngjarjes ka qenë një borxh i pashlyer nga njëri prej djemve të 70-vjeçarit.
Ngjarja ndodhi rreth orës 19:30, pranë lokalit ku Fadil Hunda qëndronte zakonisht. Adil Hizdri, pasi u konfliktua me të, u kthye në automjetin e tij, mori pistoletën dhe qëlloi disa herë drejt Hundës, duke e plagosur me dy plumba. Një patrullë policore reagoi në kohë, duke ndaluar 31-vjeçarin që tentoi të largohej nga vendi i ngjarjes. Në polici, Hizdri pranoi autorësinë e plagosjes dhe motivin e krimit.
Policia sekuestroi armën e zjarrit në cilësinë e provës materiale dhe shoqëroi në polici një 56-vjeçar që ishte me autorin në momentin e ngjarjes. I plagosuri ndodhet në spital në gjendje jo të mirë shëndetësore, ndërsa grupi hetimor vijon hetimet për sqarimin dhe dokumentimin e mëtejshëm ligjor të kësaj ngjarjeje kriminale.
@zërionline
