Zjarrvënia në stinën e verës është kthyer në një fenomen të rëndomtë, pavarësisht pasojave të rënda që shkakton. Policia e Shtetit arrestoi dy persona të dyshuar për zjarrvënie mesditën e djeshme në zonat e Golemit dhe Rrogozhinës. B. H., 60 vjeç, nga fshati Zigxhafaj, dhe Z. S., 58 vjeç, nga fshati Sineballaj, dyshohen për ndezjen e zjarreve që kanë rrezikuar banesa dhe kanë djegur parcela të mbjella me ullinj dhe pemë të tjera frutore, si dhe sipërfaqe pyjore.
Zjarrfikësit dhe Forca e Sigurisë Kombëtare, të asistuar nga një helikopter i Ministrisë së Mbrojtjes, neutralizuan flakët, duke shpëtuar banesat. Hetimet dhe veprimet operacionale të menjëhershme çuan në arrestimin e dy të dyshuarve.
B. H. akuzohet për ndezjen e zjarrit në pronën e tij, për të djegur mbeturina, që përhapën flakët dhe rrezikuan banesat dhe tokat përreth. Ndërsa, Z. S. dyshohet për një akt të ngjashëm në pronën e tij, duke shkaktuar djegien e një sipërfaqeje të mbjellë me ullinj.
Materialet procedurale janë dorëzuar Prokurorisë së Durrësit për veprime të mëtejshme për veprën penale “Shkatërrimi i pronës me zjarr”.
Policia apelon qytetarët të mos ndezin zjarre, duke paralajmëruar reagime të menjëhershme dhe ndjekje penale për autorët.
@zërionline
