Pas 34 orësh dhe 92 kilometrave të përballjes me detin, avokatja Eva Buzo, ka arritur të përmbushë një nga sfidat më të mëdha të jetës së saj. Ajo ka prekur tokën shqiptare në një nga gjiret e Gadishullit të Karaburunit, pranë Kepit të Gjuzës, pas nisjes nga brigjet e Leçes, në San Focca.
Udhëtimi i saj, i cili vitin e kaluar u ndërpre për shkak të komplikacioneve shëndetësore, këtë herë u përfundua me sukses, duke dëshmuar forcën e saj fizike dhe psikologjike. Pavarësisht vështirësive të mëdha, Eva ka ndaluar shumë pak gjatë rrugës, duke pirë vetëm ujë, dhe ka ruajtur një ritëm të pandërprerë.
Për fat të mirë, gjatë këtij udhëtimi të gjatë dhe të lodhshëm, nuk ka pasur asnjë problem serioz. Megjithatë, në momentin e mbërritjes, ajo nuk ishte në gjendje të fliste për shkak të kalcifikimit të gojës nga kripa. Gjendja e saj shëndetësore raportohet të jetë shumë e mirë, pas mbylljes së një sfide tejet të vështirë.
@zërionline
