Policia e Shtetit ka përfunduar me sukses operacionin “Fake Accounts”, që çoi në arrestimin e një 33-vjeçari nga Fushë Mamurrasi. I dyshuari përdorte llogari të falsifikuara në “Facebook” dhe “Instagram” për të shqetësuar një 24-vjeçare dhe mbante një armë zjarri pa leje.
Policia e Shtetit deklaroi mbrëmjen e sotme se ka finalizuar me sukses operacionin policor të koduar “Fake Accounts,” i cili u zhvillua nga Drejtoria për Hetimin e Krimeve Kibernetike, në bashkëpunim me DVP Durrës, Komisariatin e Policisë Kurbin dhe me mbështetjen e Forcës Kombëtare të Sigurisë Njësia Shkodër, nën drejtimin e Prokurorisë së Durrësit.
Operacioni çoi në arrestimin e një 33-vjeçari, i cili dyshohet se hapte llogari false në rrjetet sociale “Facebook” dhe “Instagram” për të shqetësuar dhe fyer 24-vjeçaren.
Hetimi filloi pas një kallëzimi në policinë e Durrësit nga 24-vjeçarja në vitin 2023, e cila raportoi për shqetësime të vazhdueshme nga llogari të falsifikuara në rrjetet sociale. Drejtoria për Hetimin e Krimeve Kibernetike, në bashkëpunim me Prokurorinë pranë Gjykatës së Durrësit, arriti të identifikonte autorin e dyshuar.
Në bazë të provave të mbledhura, Gjykata urdhëroi kontrollin e banesës së shtetasit G.M., në Fushë Mamurras ku u gjetën një kallashnikov dhe dy krehra me 46 fishekë.
©️zërionline
