Shërbimet e Policisë Kufitare kanë identifikuar një mjet lundrues të braktisur në zonën bregdetare të fshatit Karpen. Veliera, e cila po kryente lëvizje të pakontrolluara, u bllokua disa metra larg bregut, duke ngritur dyshime për aktivitet të dyshimtë.
Policia Kufitare e Spilles ushtroi një kontroll të detajuar në bord, duke zbuluar një armë zjarri pistoletë tip “Walther,” municione, dy celularë, një laptop dhe dokumentet e mjetit. Po ashtu, u gjet një pasaportë gjermane me emrin F. R., një 85-vjeçar.
Sipas hetimeve paraprake, mjeti lundrues ishte nisur nga Bari, Itali, me destinacion Kroacinë, por gjatë rrugës kishte devijuar duke kryer lëvizje të çrregullta. Autoritetet shqiptare po bashkëpunojnë me Guardia di Finanza dhe Interpol Tiranën për të verifikuar të dhënat e pasaportës dhe për të përcaktuar vendndodhjen e poseduesit të saj, i cili dyshohet se është drejtuesi i velierës.
Nga hetimet fillestare dyshohet se drejtuesi mund të ketë rënë në det për shkak të motit të keq me dallgë të larta në det të hapur. Prokuroria e Durrësit është vënë në dijeni të rastit dhe po vijon veprimet e mëtejshme ligjore.
©️zërionline
