Partia Agrare Ambientaliste (PAA) ka ngritur akuza kundër qeverisë dhe Komisionit Qendror të Zgjedhjeve (KQZ) lidhur me mungesën e financimit paszgjedhor që, sipas ligjit, i takon partisë. Përmes një deklarate për shtyp, kreu i PAA-së, Agron Duka, theksoi se partisë së tij i është mohuar financimi prej 3,544,462 lekë, pavarësisht se PAA ka arritur të sigurojë 2.6% të votave në zgjedhjet vendore të 14 majit 2023.
Sipas ligjit Nr. 10019 “Kodi Zgjedhor i Republikës së Shqipërisë”, të gjitha partitë që plotësojnë kushtet, duhet të marrin financimin shtetëror pas zgjedhjeve. Megjithatë, siç deklaron Duka, PAA është ende pa financim, ndërkohë që partitë e tjera kanë marrë jo vetëm financimin paszgjedhor, por edhe atë para zgjedhor.
PAA i është drejtuar KQZ-së për këtë çështje, dhe ky institucion ka pranuar të drejtën e partisë për financim, por ka pohuar se nuk disponon fondet e nevojshme për ta përmbushur këtë detyrim. Në përgjigjen e KQZ-së, theksohet se është dërguar një kërkesë Ministrisë së Financave që nga tetori 2023, por problemi mbetet ende i pazgjidhur.
Në deklaratën e tij, Agron Duka shpreh zhgënjimin dhe akuzon qeverinë për qëndrim të qëllimshëm anti-opozitar, duke e konsideruar këtë një akt të paprecedent në politikën shqiptare. Ai vuri në dukje se PAA, e themeluar prej 33 vitesh, nuk është një parti e përkohshme dhe kërkoi zgjidhjen sa më të shpejtë të këtij problemi.
Nëse financimi nuk jepet, PAA paralajmëron se do t’i drejtohet gjykatës për të kërkuar financimin e ligjshëm dhe kompensimin për dëmet e shkaktuara nga mos dhënia e tij në kohë.
“Po kërkojmë vetëm atë që na njeh dhe jep ligji,” përfundon Duka, duke nënvizuar se kjo është një shkelje e hapur e barazisë dhe lirisë politike në Shqipëri.
©️zërionline
