Dritan Dajti, i dënuar me burgim të përjetshëm për vrasjen e katër oficerëve të policisë gjatë një aksioni për arrestimin e tij në plazhin e Durrësit në vitin 2009, i ka vendosur një ultimatum 48-orësh Gjykatës së Elbasanit për të ndërmarrë masa lidhur me situatën e tij. Përmes avokatëve të tij, Dajti pretendon se po mbahet në mënyrë të paligjshme në Institucionin e Ekzekutimit të Vendimeve Penale në Peqin, duke kërkuar lirimin e menjëhershëm.
Sipas përfaqësuesve të tij ligjorë, vendimi për burgimin e përjetshëm ndaj Dajtit nuk është i vlefshëm, pasi pretendohet se mungon urdhri i ekzekutimit nga prokuroria, një dokument që do të duhej të zbatonte vendimin përfundimtar. Për këtë arsye, Dajti kërkon nga gjykata e Elbasanit konstatimin dhe deklarimin e pamundësisë së zbatimit të dënimit.
Rasti i Dritan Dajtit është një nga më të përfolurit në Shqipëri, për shkak të përmasave të tragjedisë që ai shkaktoi dhe odisesë së gjykimit të tij për të arritur deri tek vendimi. Në gusht të vitit 2009, gjatë një operacioni për arrestimin e tij në plazhin e Durrësit, Dajti hapi zjarr ndaj forcave të policisë, duke vrarë katër oficerë. Ky akt tronditi thellë publikun dhe forcat e rendit, duke e kthyer çështjen e tij në një simbol të luftës së pandalshme kundër krimit të organizuar në vend.
Ndërkohë, mbajtja e Dajtit në burg përballet me sfida ligjore të ngritura nga avokatët e tij, të cilët kërkojnë që çështja të trajtohet urgjentisht nga gjykata, duke paralajmëruar masa ligjore nëse nuk merren vendime brenda afatit të vendosur. Gjykata e Elbasanit pritet të shqyrtojë kërkesën në ditët në vijim, ndërsa priten zhvillime rreth këtij rasti të ndërlikuar.
©️zërionline
