Kontrolli i Lartë i Shtetit ka nisur këtë të hënë një auditim në lidhje me situatën e përmbytjeve në qytetin e Vlorës. Pjesë e këtij kontrolli do të jenë disa institucione, ku do të auditohet me prioritet për shkaqet që çuan në këtë situatë problematike. Grupi i auditimit ka nisur tashmë punën pranë këtyre institucioneve, si dhe në terren ku situata paraqitet ende problematike. Pritet që pjesë e këtij auditimi të jenë institucionet e pushtetit lokal dhe ato me varësi nga Qeveria, si për shkaqet që sollën përmbytje, ashtu dhe për menaxhimin e situatës nga institucionet përkatëse. Auditimi do të zgjasë disa ditë, për t’u përmbyllur me një raport ku do të jepen dhe konkluzionet.
Në një mbledhje me strukturat dhe specialistë të ndërtimit në Vlorë, prefekti i Vlorës, Kristaq Kiço kërkoi të verifikohen të gjitha ndërtimet mbi kanale dhe kolektorë në këto vite dhe përgjegjësit të mbajnë përgjegjësi.
“Ccdo ditë mësoj që janë bërë ndërtime mbi kanale që pengojnë pastrimin e tyre dhe rrjedhjen e ujërave të tyre. Ne duhet të riorganizojmë dhe rikonceptojmë Emergjencat Civile.”
Ndërkaq, dega e PD-së në Vlorë ka bërë kallëzim në Prokurori ndaj autoriteteve vendore për shpërdorim detyre lidhur me situatën e krijuar nga përmbytjet.
“Në lidhje me përmbytjet e zhvilluara në qytet më datë 4 tetor, ne kemi depozituar pranë Prokurorisë një kallëzim penal. Duhet drejtësi dhe përgjegjësi për dëmet e shkaktuara. Ne kërkojmë që prokuroria të veprojë me shpejtësi në mënyrë që të gjejë prova”, u shpreh kryedemokrati i Vlorës Atird Hoxha.
©️zërionline
