“Ishte porosi. Nuk dija ç’kishin brenda pakot. Do të dilnin t’i merrnin.” Kështu ka deklaruar në gjykatë 34 -vjeçari nga Tirana i cili u arrestua të enjten në portin e Durrësit.Gjykata e la të lirë, këtë të shtunë, Elton Balliun, baba i tre fëmijëve, që u arrestua pas operacionit policor të koduar “Portat” për 88,000 eurove të padeklaruara në kufi dhe 18 shisheve verë të dyshuara si kontrabandë.
Në seancën që u zhvillua me dyer të mbyllura, Balliu ka deklaruar se nuk ishte në dijeni të përmbajtjes së pakove të mbështjella me natriban dhe as nuk e dinte emrin e personit që do të vinte për ta marrë porosinë.
Me profesion shofer kamioni, Balliu, baba i tre fëmijëve, u prangos të enjten në portin e Durrësit pasi mbërriti me traget nga Bari. Paratë e ndara në 4 pako të lidhura me natriban iu gjetën të fshehura në xhup dhe në çantë, ndërsa vera u zbulua në kamionin e tij.
Prokuroria e çështjes Mediana Meta mori parasysh gjendjen shëndetësore, gjyqësore dhe atë sociale të të arrestuarit dhe kërkoi masën e sigurisë detyrim paraqitjeje për të, kërkesë që u pranua nga gjyqtari Alban Veçani. Avokati Çlirim Poga tha se Balliu nuk ka precedent të mëparshëm penalë, ndërsa ka bërë 3 ndërhyrje në zemër dhe është baba i 3 fëmijëve që presin prej tij.
Operacioni, i kryer në bashkëpunim me autoritetet italiane, Guardia di Finanza-n dhe doganën, çoi në sekuestrimin e të hollave dhe mallrave.
Pas vendimit të gjykatës, Balliu do të hetohet në gjendje të lirë për “Mosdeklarim në kufi” dhe “Kontrabandë mallrash që paguajnë akcizë”.
©️zërionline
