Dega e Partisë Demokratike në Durrës ka njoftuar se do të organizojë një protestë ditën e nesërme në hyrje të portit të Durrësit, në shenjë kundërshtimi ndaj kthimit të rreth 2100 ton mbetjeve të rrezikshme në vend.
Sipas deklaratës së shpërndarë në rrjetet sociale nga partia, këto mbetje përbëjnë një rrezik serioz për shëndetin e popullatës shqiptare. Ata pretendojnë se ekspozimi ndaj mbetjeve të tilla mund të shkaktojë sëmundje të rënda si kanceri, dëmtime të sistemit nervor, sëmundje kronike respiratore, dhe probleme neurologjike. Po ashtu, rreziku për fertilitetin dhe shëndetin e grave shtatzëna, si dhe mirërritjen e fëmijëve, është evident, sipas përfaqësuesve të Partisë Demokratike.
Deklarata nënvizon se mbetjet toksike do të ndotin ajrin, ujin dhe ushqimin, duke kërcënuar drejtpërdrejt shëndetin publik. Për këtë arsye, qytetarët janë ftuar të marrin pjesë në protestën e nesërme, për të kërkuar transparencë dhe llogaridhënie nga qeveria mbi trajtimin e këtyre mbetjeve.
Protesta pritet të shërbejë si një thirrje për mbrojtjen e shëndetit publik dhe për të detyruar autoritetet të ndërmarrin masa konkrete për menaxhimin e sigurt të mbetjeve të rrezikshme.
©️zërionline
