Unioni i Gazetarëve Shqiptarë ka dënuar ashpër bllokimin e reporterëve dhe operatorëve shqiptarë nga autoritetet greke në pikën kufitare të Kapshticës të shtunën, më 2 nëntor 2024. Sipas Unionit, ky akt përbën një shkelje të rëndë të normave të Bashkimit Europian për lëvizjen e lirë të qytetarëve dhe veçanërisht gazetarëve në këtë rast.
Gazetarët dhe operatorët e mediave kryesore shqiptare u mbajtën për rreth tre orë në pikën kufitare, në një veprim që Unioni e konsideron të papranueshëm dhe në kundërshtim me rregullat dhe normat bilaterale. Sipas raportimeve, autoritetet greke kërkuan një notë verbale nga Ministria për Europën dhe Punët e Jashtme e Shqipërisë si kusht për lejimin e kalimit të gazetarëve, gjë që Unioni e cilëson si një pengesë burokratike dhe një precedent të përsëritur.
Unioni i Gazetarëve Shqiptarë u ka bërë apel organizatave të gazetarëve në Greqi dhe organizatave ndërkombëtare që të dënojnë këtë veprim dhe të rikthejnë vëmendjen ndaj sjelljeve të përsëritura të autoriteteve greke kundër gazetarëve shqiptarë. Sipas Unionit, ky trajtim diskriminues dëshmon se disa gazetarë shqiptarë konsiderohen “të padëshiruar” nga institucionet greke, e disa kolegë ende të pashpallur zyrtarisht “non grata.”
Unioni paralajmëron se veprime të tilla dëmtojnë marrëdhëniet fqinjësore dhe minojnë parimet e Bashkimit Europian për lirinë e medias dhe respektin ndaj të drejtave themelore.
©️zërionline
