Të premten në mëngjes, anija turke “Moliva,” e ngarkuar me 2100 ton mbetje të dyshuara si toksike, pritet të ankorohet në portin e Durrësit. Për këtë operacion, autoritetet përkatëse kanë përgatitur infrastrukturën e nevojshme, sipas kërkesave të Prokurorisë së Durrësit. Anija mbërriti më 28 tetor në Durrës, por qëndroi në radën e jashtme të portit në pritje të përcaktimit të vendit për depozitimin e mbetjeve. Ajo vijon prej 10 ditësh të qëndrojë në radë.
Operacioni do të zhvillohet gjatë gjithë ditës së nesërme dhe përfshin manovrat për futjen në kalatë dhe shkarkimin e ngarkesës në terminalin e kontenierëve, ku do të vendosen fillimisht 102 kontenierët për t’u zhvendosur më pas në vendin e përcaktuar për depozitim ku do të hapen për të realizuar edhe marrjen e kampionëve që do të analizohen. Sipas burimeve nga Agjencia e Administrimit të Pasurive të Sekuestruara, mbetjet do të vendosen në një territor të sekuestruar në periferi të Durrësit, i cili është caktuar si venddepozitim.
Këto mbetje janë refuzuar më parë nga autoritetet tajlandeze për shkak të dyshimeve mbi natyrën toksike të tyre, duke e bërë të domosdoshëm kthimin dhe kontrollin e tyre në Shqipëri, ku gjithsesi mungon një landfill i posaçëm për asgjesimin e tyre nëse rezulton të kenë toksicitet të lartë.
©️zërionline
