Këto ditë, pranë Qendrës për Hapje dhe Dialog në Kryeministri, u hap ekspozita “Përherësi” e piktorit të shquar, Mjeshtrit të Madh Naxhi Bakalli. Kjo ekspozitë sjell momente kyçe nga rrugëtimi i gjatë artistik i prof. Bakallit, duke përfshirë punime që nga fillimet e tij në fëmijëri. Një nga veprat e para është një tablo me frymë moderne, dedikuar ateizmit komunist, e cila trajton prishjen e objekteve të kultit fetare. Ekspozita përfshin gjithashtu bocetin origjinal të muralesit të Skënderbeut të vitit 1982.
Puna e Bakallit pasqyron trashëgiminë popullore shqiptare dhe është një homazh për bashkëshorten e tij të dashur, Znj. Leta, muzën e tij të përhershme. Pikturat përçojnë emocione të thella, duke kombinuar linja virtuoze nga bardh e zi në ngjyra të gjalla dhe forma moderne të stilizuara, si një mozaik që përfaqëson lidhjen mes traditës dhe modernitetit.
Një tjetër dimension i krijimtarisë së tij është pasqyruar në pullat postare shqiptare, ku Bakalli ka përcjellë etnografinë dhe trashëgiminë kulturore të kombit shqiptar. Kjo ekspozitë jo vetëm që tregon pasionin e tij për kulturën, por shërben edhe si një testament i dashurisë së tij për familjen dhe traditën kombëtare.
Jetë të gjatë e krijimtari të mëtejshme, mjeshtrit të penelit Naxhi Bakalli!
Romir Nelo Llukaçi
©️zërionline
