Pesë vjet pas tërmetit shkatërrues që goditi Durrësin, gjurmët e fatkeqësisë mbeten të dukshme në jetën e shumë banorëve. Procesi i rindërtimit ka sjellë përmirësime në infrastrukturën shkollore, si dhe për shumë familje, të cilat tashmë kanë hyrë në shtëpitë e tyre të reja. Megjithatë, ka ende qindra familje që nuk e kanë mbyllur këtë kapitull.
Një pjesë e konsiderueshme e banorëve jetojnë ende në shtëpi me qira, në pritje të përfundimit të punimeve ose të zgjidhjeve të tjera nga autoritetet. Disa kanë marrë çelësat e apartamenteve përmes shorteve publike të organizuara nga bashkia, por nuk kanë mundur ende të transferohen në to për shkak të vonesave a problemeve teknike në ndërtimet e reja.
Përveç sfidave materiale, traumat dhe pasojat emocionale të asaj nate të frikshme mbeten të freskëta për shumë njerëz. Tërmeti i nëntorit 2019 shkaktoi jo vetëm humbjen e shumë jetëve, por edhe shkatërrimin e shumë objekteve që përbënin jetën dhe identitetin e qytetit.
Edhe pse Durrësi është ringritur në shumë aspekte, për të prekurit nga tërmeti, procesi i shërimit është ende larg përfundimit. Bashkia dhe qeveria vazhdojnë përpjekjet për të përmbushur premtimet e bëra, ndërsa qytetarët shpresojnë për një të ardhme më të sigurt dhe të qëndrueshme.
V. Q.
©️zërionline
