Kanali i ujërave të larta në zonën e plazhit të Durrësit është kthyer në një vatër ndotjeje dhe shqetësimi për banorët e plazhit dhe Arapajt. Mbetjet e hedhura pa kriter dhe kazanët e tejmbushur të mbetjeve urbane buzë kanalit e kanë përkeqësuar situatën.
Qeset plastike, shishet, mbetjet ushqimore dhe mbeturina të tjera kanë bllokuar rrjedhën e kanalit, duke shkaktuar erë të rëndë dhe një ndotje të dukshme të ujit. Situata ka nxitur reagime të shumta nga banorët dhe vizitorët, të cilët e konsiderojnë këtë problem si një rrezik serioz për shëndetin dhe një cenim të imazhit të qytetit.
“Kjo situatë është e papranueshme! Era është e padurueshme dhe ndotja rrezikon edhe shëndetin tonë. Nuk kemi parë ndonjë institucion që të merret seriozisht me këtë problem. Vijnë rrallë,” thotë një banor i zonës.
Ndotja ndikon negativisht dhe te vizitorët.
“Kam motrën këtu dhe vij herë pas here për ta takuar. Familjarisht vijmë këtu për të kaluar pushimet në verë, por kjo situatë është e tmerrshme. Ky kanal ndikon negativisht edhe në imazhin e qytetit,” thotë një banor i Librazhdit.
Kazanët e mbetjeve urbane, të vendosur buzë kanalit, janë të mbushur plot, duke nxitur hedhjen e mbetjeve të tjera pranë tyre. Edhe pse makinat e mbeturinave kalojnë në zonë, ato shpesh nuk arrijnë të përballojnë volumin e lartë të mbetjeve, duke përkeqësuar më tej situatën.
Banorët ndjehen të rrezikuar nga pasojat e ndotjes së kanaleve të ujërave të larta që kalojnë pranë banesave të tyre.
“Ndotja e kanaleve të ujërave të larta mund të sjellë pasoja të rënda, si për mjedisin ashtu edhe për shëndetin. Kemi fëmijë, të moshuar e të sëmurë. Më mirë ta mbyll8n fare, kur nuk arrijnë ta pastrojnë,” shprehet një tjetër banore.
Banorët kërkojnë ndërhyrje të menjëhershme nga institucionet lokale për pastrimin dhe mirëmbajtjen e kanalit, si dhe për një organizim më të mirë të mbledhjes së mbetjeve. Deri atëherë, ky kanal, që duhej të shërbente për kullimin e ujërave të larta, do të vazhdojë të mbetet një burim ndotjeje dhe shqetësimi për komunitetin dhe vizitorët e zonës.
©️zërionline
