Porti i Durrësit po përballet me një numër të shtuar udhëtarësh dhe automjetesh gjatë këtyre ditëve, si pasojë e lëvizjeve masive për festat e fundvitit. Sipas të dhënave nga Kapiteneria e Portit Detar, vetëm në 8 ditët e fundit, kanë hyrë në vend 25,477 udhëtarë dhe 7,738 automjete. Ky fluks përbëhet kryesisht nga anëtarë të diasporës shqiptare që rikthehen për të kaluar festat pranë familjarëve në Shqipëri dhe Kosovë, por edhe nga shtetas të huaj që kanë zgjedhur të kalojnë disa ditë pushimesh dimërore në vendin tonë.
Për të përballuar këtë fluks udhëtarësh, kompanitë që operojnë linjat detare kanë shtuar kapacitetet e tyre. Tragetet e linjës Durrës-Bari e kthim kanë nisur të kryejnë lundrime të dyfishta gjatë ditës, ndërsa linja Durrës-Ankona ka shtuar lundrimet mes dy porteve për të plotësuar kërkesën në rritje.
Megjithatë, situata është komplikuar nga një incident që ndodhi në fillim të kësaj jave. Njëri prej trageteve të linjës ka dalë përkohësisht nga shërbimi, pasi gjatë manovrave të ankorimit në Portin e Durrësit, në kushte të motit të keq, ka dëmtuar helikën e tij duke u përplasur me spirancën e tragetit tjetër që ishte ankoruar më parë në kalatë. Pas dëmtimit të helikës, ai do t’i nënshtrohet riparimeve, ndërsa kompanitë e lundrimit po e menaxhojnë situatën me tragetet në dispozicion.
Sipas Kapitenerisë së Portit të Durrësit, autoritetet portuale kanë marrë masa për të shmangur vonesat dhe për të garantuar shërbim efikas për udhëtarët që zgjedhin të lëvizin përmes portit më të madh në vend. Porti i Durrësit vazhdon të jetë një nyjë kyçe për lidhjet ndërkombëtare, veçanërisht gjatë periudhës së pushimeve, kur fluksi i lëvizjeve arrin kulmin.
I njëjti fluks pritet të vazhdojë edhe në ditët e para të janarit, por në kah të kundërt, kur emigrantët do të kthehen në vendet ku jetojnë dhe punojnë.
©️zërionline
