Një studim i realizuar nga Qëndresa Qytetare ka hedhur dritë mbi shkallën e korrupsionit në universitetet publike në Shqipëri, duke nxjerrë në pah se fenomeni është ende një sfidë serioze për sistemin arsimor. Eksperti i QQ, Mateo Yskollari, ka përpiluar të dhëna nga një anketë e kryer në 12 universitete publike dhe informacione të mbledhura nga Prokuroria e Përgjithshme dhe prokuroritë rajonale, duke ofruar një analizë të thelluar të situatës.
Rezultatet tregojnë se 77% e studentëve të anketuar besojnë se korrupsioni është i pranishëm në universitetet ku ata studiojnë. Për më tepër, 62.2% e të anketuarve pranojnë se korrupsioni manifestohet edhe në nivel programi studimi ose departamenti.
Universiteti i Mjekësisë në Tiranë rezulton institucioni më problematik, ku 100% e studentëve të tij raportojnë praninë e korrupsionit, duke e bërë atë “kampion” të korrupsionit në vend. Në anën tjetër, Universiteti Politeknik i Tiranës dhe Universiteti i Shkodrës u renditën si më pak të prekur nga ky fenomen.
Anketa zbuloi gjithashtu se 51% e të anketuarve mendojnë se si administrata ashtu edhe trupa akademike janë njësoj të përfshira në praktika korruptive. Kjo lidhje e ngushtë midis këtyre dy grupeve është një nga arsyet kryesore që korrupsioni vijon të jetë kaq i përhapur. Roli ndërmjetës i administratës, veçanërisht në raste si “pagesa në këmbim të notës,” është veçuar si një nga format më shqetësuese të korrupsionit.
Nepotizmi, një sëmundje e vazhdueshme
Nepotizmi mbetet një tjetër problem madhor, ku lidhjet familjare mes personelit akademik dhe administratës ndikojnë ndjeshëm në funksionimin e universiteteve. Ky fenomen, sipas studimit, vazhdon të dëmtojë integritetin dhe besueshmërinë e sistemit arsimor.
Sipas të dhënave të SPAK dhe prokurorive rajonale, gjatë periudhës 2021-2024, janë kallëzuar 18 pedagogë për korrupsion aktiv dhe pasiv. Ndër këta, 2 pedagogë janë kallëzuar, ndërsa 7 të tjerë janë hetuar.
Studimi i Qëndresës Qytetare nxjerr në pah një realitet të hidhur për universitetet publike në Shqipëri, ku korrupsioni dhe nepotizmi vazhdojnë të jenë sfida madhore. Raporti nënvizon nevojën për reforma të thella që do të rrisin transparencën dhe do të forcojnë integritetin akademik, duke mbrojtur studentët dhe sistemin arsimor nga fenomenet që cënojnë të ardhmen e tyre.
©️zërionline
