Qeveria ka miratuar këtë të mërkurë një vendim për zgjatjen e vlefshmërisë së dokumenteve të identifikimit, duke i lejuar qytetarët me pasaporta dhe karta ID të skaduara të marrin pjesë në zgjedhjet parlamentare të 11 majit.
Ministri i Brendshëm, Ervin Hoxha, e cilësoi këtë akt si një vendim të rëndësishëm, i cili u jep mundësinë rreth 500 mijë qytetarëve shqiptarë, brenda dhe jashtë vendit, të ushtrojnë të drejtën e tyre kushtetuese për të votuar.
Sipas tij, pas miratimit të vendimit, shtetasit me dokumente të pavlefshme mund të regjistrohen në Platformën Elektronike të Regjistrimit të Komisionit Qendror të Zgjedhjeve (KQZ) dhe të votojnë sipas udhëzimeve të këtij institucioni.
Lidhur me propozimin e Partisë Demokratike për të lejuar votimin e shqiptarëve që jetojnë jashtë dhe nuk kanë dokumente shqiptare, por vetëm të huaja, Ministri Hoxha sqaroi se një gjë e tillë nuk është e mundur, pasi nuk parashikohet nga ligji.
©️zërionline
