Punonjës të administratës së Bashkisë Tiranë dolën sot në protestë para SPAK-ut, jo për të kërkuar drejtësi ndaj aferave korruptive, por për të mbrojtur të akuzuarit për korrupsion.
Mes protestuesve u panë edhe efektivë të Policisë Bashkiake, të cilët, në një skenë të pazakontë, qëndronin përballë kolegëve të tyre të rendit. Ky grup protestuesish u rreshtua në mbrojtje të kryebashkiakut të arrestuar Erion Veliaj, i cili ndodhet nën hetim.
“Ky lumë qytetarësh, që sot protestoi para SPAK-ut, duhej të ishte aty për ta mbështetur atë në goditjen e korrupsionit, jo për të sfiduar drejtësinë. Zhvatja e fondeve publike nuk bën përjashtime dhe prek të gjithë qytetarët, ndaj reagimi i shoqërisë duhet të jetë kundër abuzuesve dhe jo në mbrojtje të tyre.”, u shpreh në një deklaratë të saj organizata Qëndresa Qytetare.
Ndërkohë, ky realitet dëshmon edhe një herë se edukimi mbi korrupsionin duhet të fillojë në shkolla. Kultura e pandëshkueshmërisë dhe toleranca ndaj abuzimit me pushtetin tregojnë se nevojitet një Task Force Antikorrupsion që të ndërgjegjësojë brezat e rinj mbi pasojat e korrupsionit.
Qëndresa Qytetare u shpreh se inkurajon SPAK dhe GJKKO që të vijojnë goditjen e korrupsionit në të gjitha nivelet, duke çuar përpara procesin e pastrimit të institucioneve nga ata që kanë keqpërdorur besimin publik.
©️zërionline
