Këshilltari bashkiak i Durrësit, Joni Myshketa, ka reaguar pas vendimit të Gjykatës Administrative të Apelit Tiranë, e cila rrëzoi padinë e ngritur prej tij kundër tarifimit të parkimeve me pagesë në zonat A dhe B të qytetit nga Bashkia Durrës.
Në një deklaratë publike, Myshketa bëri të ditur se pavarësisht këtij vendimi, ai do të ndjekë të gjitha rrugët ligjore, duke e çuar çështjen në Gjykatën e Lartë. Sipas tij, ky është një hap i domosdoshëm për mbrojtjen e interesave të qytetarëve durrsakë, pasi tarifimi i parkimeve ndikon drejtpërdrejt në buxhetin e tyre.
“Kjo nuk bëhet për kredo politike apo për interesa të ngushta personale, por për një të drejtë të përbashkët. Aktualisht, qyteti përballet me rrugë të mbingarkuara, rrethrrotullime të shumta, ngushtime të trotuareve dhe zënie abuzive të hapësirave të parkimit. Përpara se të aplikojë tarifimin, Bashkia Durrës ka detyrimin të sigurojë alternativa për parkime të lira,” tha Myshketa.
Ai argumentoi se në një situatë ku hapësirat e parkimit janë të reduktuara dhe shpesh të uzurpuara në mënyrë të paligjshme, përgjegjësia bie mbi institucionet vendore dhe jo mbi qytetarët, të cilët ndëshkohen me gjoba pa iu ofruar zgjidhje të qëndrueshme.
Në këtë kontekst, këshilltari Myshketa ftoi median vendore të marrë pjesë në një takim informues nesër në orën 10:00, ku do të diskutohet më gjerësisht mbi ndikimin e tarifimit të parkimeve në Durrës dhe hapat e mëtejshëm ligjorë që do të ndërmerren.
©️zërionline
